!!!عفیف سراج کی غزلیں

میکدے کی ہے آبرو ساقی

ہے مگر تو بہانہ جو ساقی

جشن مئے کی یہ آخری شب ہے

بات کر ہم سے دو بہ دو ساقی

احترام ازان تھا ہمہ دم

مئے سے کرتے رہے وضو ساقی

ہے یہ تسخیر خون دل کا اثر

ہے جو یہ جام مشک بو ساقی

دوڑ میکش نے اپنے ہاتھوں سے

کاٹ لی ہے رگ گلو ساقی

——— 2 ——-

ہم ایسے رند تھے ہم ساری مئے مستانہ پی آئے

بھلا دو جام کیا میخانے کا میخانہ پی آئے

بڑا پردہ تھا اُس گُل رخ کو لیکن ہم بھی کیا کم تھے

مئے جلوہ بہ رنگِ دیدہء جانانا پی آئے

تمام اہلِ خرد تہذیبِ مئے نوشی کے مارے تھے

وہ بیٹھے رہ گئے ہم ساغرِ دیوانہ پی آئے

شریفوں کو تھا مغرب بعد تک کا صبر لیکن ہم

سرورِ فجر کے جاگے تھے اور ظہرانہ پی آئے

نکالا خوش لباسوں نے ہمیں جب بزم سے اسکی

چُرا لائے ذرا سی اور سرِ ویرانہ پی آئے

مہک ہے اپنے لہجے میں جو اسکی دل نوازی کی

بتائیں؟ دھو کے مئے سے اسکا ہم خس خانہ پی آئے

ہمیں معلوم تھا وہ بزم میں کچھ کہہ نہ پائے گا

سو اسکے ہاتھ سے پیمانے پر پیمانہ پی آئے

سراج اسکی گلی اسکا مکاں اسکا درِ دولت

مئے لاہوت ہم تھے جو سرِ بتخانہ پی آئے

——– 3 ———–

الوداع اے بزمِ الفت شہرِ جاناں الوداع

اے مئے و مینا و ساغر پیرِ رنداں الوداع

اے شبانِ کیف و مستی آخری تجھکو سلام

بادہء احمر سلام اے رنگِ خوباں الوداع

اے حریمِ ناز و عشوہ رخصتِ آخر قبول

اے بتِ کافر سلام اے ذوقِ عصیاں الوداع

اے زُلالِ جامِ ساقی کوزہءِ لبریزِ خوں

غیرتِ رنگِ شفق شامِ بدخشاں الوداع

حسرتِ فصلِ بہاراں نغمہءِ مرغِ چمن

الوداع اے خنکیِ صبحِ درخشاں الوداع

الوداع اے حلقہءِ دستِ صباءِ نو بہار

الوداع اے شاخِ لالہ گل فروشاں الوداع

الوداع اے گرمیِ روزِ تلاش و جستجو

اے شکستہ مضمحل شامِ غریباں الوداع

اے خوشاں کہ لمحہءِ رخصت کی آمد ہو گئی

السلام اے بزمِ خاکی شہر و ویراں الوداع

بسنے والا ہوں سراج اب ذکر میں یادش بخیر

بیڑیاں، طوق و سلاسل کنجِ زنداں الوداع

———— 4 ———–

لکھتے لکھتے ترا افسانہ قلم ڈال دیا

کوزہء چشم میں پھر دیدہء نم ڈال دیا

کعبہ دل سے نکالا جو گیا تھا پہلے

آج تونے وہی دیرینہ صنم ڈال دیا

بادہ نوشوں کے لئے ہیں یہ سفالی کوزے

ان میں کس کے لئے اک ساغر جم ڈال دیا

محو_ آئینہ رہا کرتا تھا معصوم سا حسن

وائے ہو اسکی طبیعت میں ستم ڈال دیا

ہم نے سلجھائے معانی کے الجھتے گیسو

تم نے اس کاکل شائستہ میں خم ڈال دی